मकवानपुर गोल्डकप- पुलिसलाई हराउँदै ‘विजय युथ क्लब हेटौंडा’ फाइनलमा प्रवेश
हेटौंडामा जारी स्थानीय तह शहीद स्मृति मकवानपुर गोल्डकप फुटबल प्रतियोगिताको आजको खेलमा घरेलु टोली विजय युथ क्लब हेटौंडा विजयी भएको छ ।
नेपाल पुलिसलाई १–० गोलले हराउँदै विजय युथ फाइनल प्रवेश गरेको हो । घरेलु टोली विजय युथका विदेशी खेलाडी पेपेले खेलको दोस्रो हाफको छैठौं मिनेटमा गोल गरे । उनको गोल नै आजको खेलको निर्णायक गोल बन्यो । खेलको म्यान अफ द म्याच पेपे घोषित भए।
सेमीफाइनल अन्तर्गतको अर्को खेल भोलि क्यामरुनको एभिनियर एफसी र त्रिभुवन आर्मी फुटबल क्लब बीचको हुने आयोजकले जनाएको छ ।
जिल्ला फुटबल संघ मकवानपुरको आयोजनामा जेठ ३० गतेसम्म सञ्चालन हुने प्रतियोगितामा १२ वटा क्लबले सहभागिता जनाएका छन् ।
प्रतियोगिताको विजेता टोलिले शिल्ड, मेडल र प्रमाणपत्रसहित १५ लाख र उपविजेता टोलिले १० लाख प्राप्त गर्ने छन् । प्रतियोगितामा सर्वोकृष्ट खेलाडीलाई बुलेट बाइक प्रदान गरिने छ भने विधागत उत्कृष्ट खेलाडीलाइ २५ हजार र हरेक खेलमा म्यान अफ दि म्याच खेलाडीले १० हजार प्राप्त गर्नेछन् ।
