चुनावको मुखमा अर्थमन्त्री भेटघाटमा
अर्थमन्त्री जनार्दन शर्मा पछिल्ला केही दिनदेखि भेटघाटमा व्यस्त देखिनुभएको छ । नेपाल राष्ट्र बैंकका गभर्नर महाप्रसाद अधिकारीलाई निलम्बनको प्रस्ताव गरेपछि एकाएक चर्चामा आउनुभएका मन्त्री शर्मा सर्वोच्च अदालतले गभर्नरलाई अन्तरिम आदेशको निरन्तरता दिएपछि औपचारिक कार्यक्रममा कम देखिनुभएको हो ।
तर उहाँ मन्त्रालयमा भेटघाटमा व्यस्त हुनुभएको मन्त्रालय स्रोतले बताएको छ । आज मध्यान्ह उहाँले स्वीट्जरल्याण्डका राजदूत एलिजावेथ भान क्यापलरसँग आफ्नै कार्यकक्षमा भेट गर्नुभएको छ ।
उहाँहरुबीच मध्यान्ह १२ बजदेखि झण्डै आधा घण्टा कुराकानी भएको मन्त्रालय स्रोतले पुष्टि गरेको छ । हिजो उहाँ चार्टर्ड एकाउण्टेण्टहरुको कार्यक्रमलाई सम्बोधन गर्न पुग्नुभएको थियो ।
गभर्नर अधिकारी र ३० हजार डलर घुस मागेका भनिएका नेपाल राष्ट्र बैंकका सञ्चालक सुवोधकुमार कर्ण पनि चार्टर्ड एकाउण्टेण्ट हुन् ।