देशभर १२ बजेसम्म झण्डै ३५ प्रतिशत मत खस्यो
निर्वाचन आयोगले मध्याह्न १२ बजेसम्ममा झण्डै ३५ प्रतिशत मतदान भएको जनाएको छ ।
आज (शुक्रबार) बिहान सात बजेदेखि देशभर स्थानीय तह सदस्यका लागि निर्वाचन भइरहेको छ । आयोगले मध्याह्न १२ बजेसम्ममा झण्डै ३५ मतदाताले मतदान गरेको जनाएको हो । अहिलेसम्म झण्डै ३५ प्रतिशत मतदान भएको निर्वाचन आयोगका प्रवक्ता शालिग्राम शर्मा पौडेलले जानकारी दिए ।
दोलखा, सर्लाही, सप्तरी, रामेछाप, पर्वत, हुम्ला र बाजुराका केही मतदानस्थलमा झडप भएर मतदान कार्य रोकिएको र नियमित गराउने प्रयास भइरहेको आयोगले जनाएको छ ।
आयोगले फाटफुट घटनाबाहेक शान्तिपूर्ण तथा उत्साहजनक रूपमा मतदान भइरहेको जनाएको छ । स्थानीय तहको निर्वाचनका लागि ७५३ वटा स्थानीय तहका १० हजार ७५६ मतदान स्थलका २१ हजार ९५५ मतदान केन्द्रबाट मतदान भइरहेको छ ।