माधव नेपाललाई झट्का वाला ‘बर्थ डे गिफ्ट’ !
प्रधानमन्त्री कपी शर्मा ओलीलाई जस्तै पूर्वप्रधानमन्त्री माधवकुमार नेपाललाई पनि सर्वोच्चले जन्मदिनको दिन झट्का दिएको छ । यस अघि सर्वोच्चले फागुन ११ गते प्रधानमन्त्री केपी शर्मा ओलीको जन्मदिनकै दिन संसद पुन:स्थापना गरेको थियो।
आज आइतबार माधवकुमार नेपालको जन्मदिन । जन्मदिनकै दिन सर्वोच्च अदालतले केपी शर्मा ओली र पुष्पकमल दाहाल ‘प्रचण्ड’ नेतृत्वमा निर्वाचन आयोगमा दर्ता भएको नेकपा खारेज गरेर माधव कुमार नेपाललाई झट्का दिने खालको ‘गिफ्ट’ दिएको छ।
सर्वोच्च अदालतले ओली-प्रचण्ड नेतृत्वको नेकपा खारेज गर्दै ऋषि कट्टेल नेतृत्वको नेपाल कम्युनिष्ट पार्टी नेकपालाई आधिकारिकता दिएको हो। सर्वोच्च अदालतले तत्कालीन दल नेकपा एमाले र नेकपा माओवादी केन्द्रलाई साबिककै अवस्थामा फर्काएको छ । नेकपा एमालेका अध्यक्ष केपी शर्मा ओली हुन् भने नेकपा माओवादी केन्द्रका अध्यक्ष प्रचण्ड हुन्।
सर्वोच्चको फैसलासंगै अब ओली र दाहाल–नेपाललाई नयाँ दल दर्ताको बाटो खुलेको छ ।
अदालतले एमाले र माओवादीलाई साबिककै अवस्थामा फर्काएपनि आयोगमा २०७६ भदौ १५ गते नेपाल कम्युनिष्ट पार्टी (माओवादी केन्द्र) र २०७७ श्रावण २० गते नेपाल कम्युनिष्ट पार्टी (एमाले) दर्ता छ ।
निर्वाचन आयोगमा एमाले र माओवादी केन्द्र खाली भएपछि मोरङकी पूर्वएमाले कार्यकर्ता सन्ध्या तिवारीले आफ्नो नाममा नेकपा (एमाले) दर्ता गराएकी थिइन् भने पूर्वमाओवादी नेता गोपाल किराँतीले आफ्नो नाममा नेकपा (माओवादी केन्द्र) दर्ता गरेका थिए।
