सिडिओ र मन्त्रालयले स्टक छ भनेको केहिदिनमै हेटौंडामा अक्सिजन अभाव, सबै निकाय मौन
मकवानपुरका प्रमुख जिल्ला अधिकारी भारत मणि पाण्डेले केहिदिन अगाडी कार्यालयमा संचारकर्मीसंगको छलफलमा भनेका थिए, ‘जिल्लामा अक्सिजनको अभाव हुदैन, यहाँ अक्सिजन नपाएर कुनै बिरामी उपचारबाट बन्चित हुनु पर्दैन’ ।
तर उनले यो भनेको एकहप्ता बित्न नपाउदैं हेटौंडामा अक्सिजनको हाहाकार भएको छ कोरोना संक्रमित अक्सिजन नपाएरै मृत्यु वरण गर्नुपर्ने अवस्था पुगेका छन् । प्रशासनले बेलैमा तयारी गर्न नसक्दा कोरोना संक्रमित उपचार पाउँनबाट बन्जित भएका हुन् ।
कोरोना माहामारी तिब्ररुपमा बढ्दै गएपछि जिल्लामा भयावह स्थिति सृजना भएको छ । बागमती प्रदेशको राजधानी समेत रहेको हेटौंडामा सरकारले बेलैमा यस प्रति चासो नदिदा अवस्था भयावह बनेको हो ।
हेटौंडा अस्पतालको कोभिड १९ उपचार कक्ष सबै भरिएका छन् भने थप बिरामीको उपचार गर्ने ठाउँ छैन । उता अक्सिजन अभाव भएकाले अब उपचार गर्न नसक्ने भन्दै अस्पताल संचालन तथा व्यवस्थापन समितिले एक बिज्ञप्ति निकालेर उपचार गर्न नसक्ने अवस्था आएको बताएको छ ।
उता यहाँका निजि २ अस्पतालले पनि आजैदेखि कोभिडका बिरामी उपचार गर्न नसक्ने बताएका छन् । हेटौंडा अस्पताल बाहेक मकवानपुर सहकारी र चुरेहिल अस्पतालमा कोभिडका बिरामीको उपचार हुदै आइरहेको थियो ।
सरकारले बेलैमा अक्सिजनको जोहो गर्न नसक्दा हेटौंडामा कोरोना संक्रमितले उपचार नपाउने भएका छन् । तर यसप्रति सरकार भने मौन बसेको छ प्रदेशको सामाजिक बिकास मन्त्रालयले पनि यस अघि यहाँ अक्सिजन अभाव हुन नदिने बताएको थियो । आफुसंग स्टकमा अक्सिजन रहेको र अन्य जिल्लाका अक्सिजन यहाँ मोभिलाइज गर्ने मन्त्रालयका कोभिड प्रवक्ता डाक्टर पुरुषोत्तम सेडाईले बताएका थिए । तर जिल्ला प्रशासन र प्रदेश सरकारको झुटका कारण जिल्लामा कोरोना संक्रमितले अक्सिजनको अभावमा मृत्यु वरण गर्नुपर्ने अवस्था सृजना हुन लागेको छ ।
यस बिषयमा हामीले मन्त्रालयमा बुझ्न खोज्दा सम्पर्क हुन सकेको छैन । मन्त्रालयले पनि यसबारे हालसम्म मौन छ ।