त्रिदेशीय क्रिकेट शृंखलामा नेपालको दोस्रो जीत
नेपाल, मलेसिया र पीएनजीबीचको त्रिदेशीय क्रिकेट शृंखलामा नेपालले लगातार दोस्रो जीत हात पारेको छ ।कीर्तिपुरस्थित त्रिवि क्रिकेट मैदानमा बुधवार भएको खेलमा नेपालले मलेसियालाई ६ विकेटले पराजित गरेको हो ।
मलेसियाले दिएको १ सय १५ रनको लक्ष्य नेपालले १३ ओभर ४ बलमा ४ विकेट गुमाएर पूरा गर्यो ।
नेपालको जीतमा ओपनर आसिफ शेखले ५७ रनको अर्धसतकीय पारी खेले ।उनका अलावा दीपेन्द्रसिंह ऐरीले २१, दिलिप नाथले अविजित १५ र रोहित पौडेलले १२ रनको योगदान गरे ।अन्य ब्याट्सम्यानले भने दोहोरो अंकमा रन बनाउन पाएनन् ।
यसअघि टस हारेर पहिले फिल्डिङको निम्तो पाएको नेपालका लागि कप्तान सन्दीप लामिछाने र करण केसीले समान २ तथा अविनाश बोहरा, दीपेन्द्रसिंह ऐरी र कुशल मल्लले १-१ विकेट लिएका थिए ।आफ्नो पहिलो खेलमा नेपालले पीएनजीलाई पराजित गरेको थियो ।
तीनै टीमले एकअर्काविरुद्ध २/२ खेल खेलेपछि शीर्ष दुई टोलीले फाइनलमा प्रतिस्पर्धा गर्नेछन् ।हाल नेपाल अंक तालिकाको पहिलो स्थानमा छ ।