चुनाव रोक्नुपर्ने विप्लवको मागप्रति देव गुरुङ लचिलो
आगामी बैशाख ३० गते हुने भनिएको स्थानीय तहको निर्वाचनमा आफ्नो दललाई पनि अवसर दिनुपर्ने नेकपा विप्लव समूहको आग्रहप्रति माओवादी केन्द्रका नेता देव गुरुङले सकारात्मक टिप्पणी गरेका छन् । उनले विप्लवले चुनावमा भाग लिने हो भने निर्वाचन रोक्नुपर्ने आशय व्यक्त गरेपछि निर्वाचन सर्ने आकलन गरेकालाई बल पुगेको छ ।
निर्वाचन सार्ने रणनीति सबै गठबन्धनमा आवध्द दलहरुको डिजाइन भएको विपक्षी एमालेको आरोप छ । उसले गठबन्धनलाई चुनावमा जान अझै धरमर भएकाले नयाँ फण्डा निकालेको बताएको हो ।
एमाले स्रोतअनुसार स्थानीय पालिकाको नेतृत्व लिनेमा गठबन्धनभित्र महत्वाकांक्षीहरु धेरै देखिएकाले त्यसको व्यवस्थापन सबैभन्दा ठूलो चुनौती बनेको छ । उम्मेदवार मनोनयन गर्न १५ दिन बाँकी छँदा पालिकामा कसको नेतृत्व हुने भन्ने विषयको अन्यौलले त्यहिँभित्र कुटाकुट हुने एमालेको विश्लेषण छ ।
एमालेमा भने पार्टी अध्यक्ष केपी शर्मा ओलीले जसलाई तोक्यो उसैलाई टिकट दिने परिपाटी भएकाले गठबन्धनमा झैँ मारामार नहुने स्पष्ट छ । त्यसैले गठबन्धन दलहरुबाट टिकट नपाएर बिच्किने राम्रा उम्मेदवारलाई एमालेले ‘क्यास’ गर्ने तयारी भएको स्रोतको दाबी छ ।
उता लुम्बिनी प्रदेशमा एमाले अझै पनि पहिलो नम्बरमा रहेको एउटा सर्वेक्षणबाट देखिएको छ । त्यहाँका ५३ वटा नगरपालिकामा अझै पनि एमाले अगाडि,३९ मा काँग्रेस र १७ स्थानमा माओवादी पहिलो हुने अनुमान छ ।
गठबन्धन भएमा चाहिँ एमालेले सोझै हार्ने अवस्था छ । पाल्पामा सोमप्रसाद पाण्डेको प्रभावका कारण नेकपा एकीकृत समाजवादीको बर्चस्व रहेको अन्य पार्टीको बुझाइ छ । हालै सम्पन्न लुम्बिनी प्रदेशस्तरीय गठबन्धन बैठकमा नेकपा एकीकृत समाजवादी अनुपस्थित हुनुलाई धेरैले शंकाको दृष्टिकोणले हेरेका थिए ।
अर्कोतर्फ लुम्बिनी प्रदेशमा माओवादी र एमाले मिलेर जानुपर्ने भन्दै भित्रभित्रै कुरो भइरहेको दाबी गर्नेहरु पनि देखिएका छन् । उक्त पहल एमालेकै स्थानीय नेताहरुबाट भएकाले एमाले अध्यक्ष ओलीको ‘संकेत’ कुरिएको उनीहरुले बताएका छन् ।
अर्कोतर्फ मुलुकको आर्थिक अवस्था श्रीलंकाको जस्तै हुन लागेको विषयलाई अहिले विपक्षी एमालेले गाउँ गाउँसम्म पुर्याएको छ । अर्कोतर्फ आयल निगमले पेट्रोलियम पदार्थको भुक्तानी गर्न धौ धौ परेको अवस्थालाई देखाउँदै सरकारले वित्तीय संकट लगाउन सक्ने एमालेको आशंका छ । त्यस्तो अवस्थामा चुनाव पर सार्ने खेल हुनसक्ने उसको बुझाइ हो ।